صحيفة نبض الشعب الاسبوعيه رئيس التحرير جعفر الخابوري

ما يطلبه المشاهدون "يويا و النبي يوسف الصديق"

قبل ما اتكلم معاك في الليله الطويله دي المفروض يكون الشاي ابو نعناع بتاعك بيتصب دلوقتي .. يلا !

شخصيه يويا من ابرز الشخصيات في اواخر الاسره ال18
و اهميته يمكن بترجع لزوجته تويا اللي ارتبطت بالعائله المالكه ‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍المهم ..
الاتنين خلفوا تلات عيال ..اتنين منهم مهمين جدا في التاريخ المصري ..واحد هيبقي ملك وهو "آي" والتاني كاهن وهو "عانن" والثالثة هتبقي زوجة ملك ومهمة وهي الملكة "تي" .. والعيلة دي كلها اصولها من "اخميم" بسوهاج و ده اللي اثبته الحمض النووي ويويا كان بيملك عزبة كبيره في اخميم وكان المفروض انه من الاثرياء .. ويويا كان في الاصل كاهن للاله "مين" والمشرف علي ماشية معبد الاله ..كل دا في اخميم .. لكنه اترقي وبقا له لقبين الاول "مشرف علي اسطبل الاحصنة" والتاني هو" الاب الالهي لسيد الارضين "

موضوع اصل يويا كان مثار جدل بين الباحثين من ساعه ما اكتشفوا مقبرته وفحصوا موميائه ..وكانت المناقشات بتدور حوالين ثلاث نقاط
1- اسم يويا
2- وشكله
3- واللقب اللي حمله
الجراح "اليوت سميث" اللي هو اول من فحص مومياء يويا علق علي شكل يويا وقال ان شكله ميبانش انه مصري لكن من الصعب نحدد جنسيته وكمان الاثري "جيمس كويبل" مكتشف مقبرة يويا قال انه شاكك ان يويا مصري واسمه اللي اتكون من مقطعين متكررين بيدل علي انه مش مصري وكويبل بيكمل ويقول لكن كل حاجة في مقبرته بتقول انه مصري !!

يويا كان "مشرف علي الاصطبلات والاحصنة" في الاسطبل الملكي بتاع الملك امنحتب الثالث وشوفوا بقا نظريتهم بتقول ايه بما ان الحصان والعربية الحربية اختراع جاي من الشرق يبقي اصول يويا من "ميتاني" (شمال ووسط العراق الحالي) وكمان راحوا لابعد من كده ..قالو ان يويا يبقي اخو الاميرة الميتانية "موت ام اويا" واللي هي ام الملك امنحتب الثالث و دي افتراضية مفيش اي دعم ليها !!
وفيه افتراضية تانية بتقولك ان يويا ربما ابن مهاجر او اسير اسيوي استقر بيه الحال في اخميم بالصعيد و برضه مفيش ادلة !!
وعموما موضوع انه اجنبي عايزة ادلة قوية زي دراسة الحمض النووي وتشوف لو عند يويا "هابلوجروب" ( مجموعة جينات ) مميز في فلسطين ولبنان وسوريا والعراق

يويا بعد وفاته اتدفن هو ومراته في المقبرة ٤٦ بوادي الملوك وربما يكون الترخيص ده بالدفن في وادي الملوك بسبب بنته الملكة تي زوجة الملك امنحتب الثالث لان معروف مفيش حد بيندفن في وادي الملوك الا لو كان ملك ومقبرته اكتشفوها سنة ١٩٠٥ عن طريق جيمس كويبل لصالح المليونير الامريكي "تيودور ديفز" اللي كان واخد تصريح من وزاره الاثار بالحفر ساعتها و لقي في المقبرة دي الاثاث الجنائزي ومومياء يويا وزوجته تويا

اليوت سميث فحص مومياء يويا .. و طبعا كان مركز علي الصفات الشكلية للمومياء و قالك إن يويا راجل عجوز عمره ٦٠ سنة وطوله ١٦٥ سم وشعره ابيض مموج ولكن بياض الشعر بسبب مواد التحنيط و حواجبه ورموشه بنية واذنيه مش مثقوبة و أذرعه مثنيه واليدين تحت الذقن وهما في وضع الامتداد مش مقفولين وصباع من ايده اليمين كان متغطى بالذهب وفيه كتان في محجر عينيه والفراغ اللي موجود في بطنه مليان بحشوات كتانية مغموسة في زيت الراتنج

الدكتور زاهي حواس فحص برضه مومياء يويا بالاشعة المقطعية بس الفحص ماطلعش بنتايج جديدة عن فحص اليوت سميث فيما يتعلق بالعمر وقال ان عمره ما بين ٥٠ و ٦٠ سنة اعتمادا علي دراسة عظام المفاصل وتآكل الاسنان ويمكن المعلومات الجديدة اللي خرجنا بيها من الاشعة المقطعية هي المتعلقة بعملية التحنيط و وضحت بإن فيه راتنج علي مستويين داخل الجمجمة وفيه حشو جوه فمه والاشعة مقدرتش تعرف سبب وفاة يويا

يويا كان هدف اساسي للباحث احمد عثمان في كتابه اللي صدر عام ١٩٨٧ بعنوان " غريب في وادي الملوك " و كلمة غريب في العنوان تديك ايحاء بان دي الشخصية الغريبة الوحيدة اللي اتدفنت في وادي الملوك .. و ده طبعا غير صحيح ماهو القائد العسكري "ماي حر بري" كان غريب واتدفن في وادي الملوك ..
المهم انه وصل بكتابه دا لنظرية ان النبي يوسف ( اللي هو يويا من وجهة نظره ) وصل لمصر في عهد امنحتب الثاني وانه عاش في عهد تحتمس الرابع القصير وانه اخد مكانته في السلطة في عهد امنحتب الثالث ولما مات في عهده اتدفن في مقبرة بوادي الملوك !!

نظريته اتأسست علي ادلة افتراضية هو جمعها وشايفها انها كافية من وجهه نظره فتعالى اقولك ع الادله :

- اسم يويا كان صعب علي المصريين وكتبوه بكذا طريقة لانه غريب وهما مش عارفين ينطقوه ودا بيأكد ان يويا مش مصري وشخصية غريبة عن مصر

- اللقب الي حمله يويا وهو الاب الالهي او ابو الفرعون هو نفس اللقب اللي حمله يوسف في التوراة ( ابا الفرعون )

- العربة الحربية اللي لاقوها في مقبرة يويا هي من ضمن الهدايا اللي اتذكرت في التوراه واللي اهداها اللملك ليوسف لما فسر الحلم للملك

- ملامح وجه يويا وانفه المعقوف بتدل انه مش مصري .. وان يويا مات كبير في السن وان ملامح وجهه بتؤكد انه كان وسيم وهو صغير وده نفس المعلومات المذكورة في التوراة

- خلو مقبرة يويا من اي مناظر مصرية عن الالهة والديانة المصرية بتدل انه مؤمن وموحد بالله !!

- مومياء يويا هي المومياء الوحيدة المحفوظة و ده معناه أنه مش شخص عادي بل هو نبي !!

- دفن يويا في وادي الملوك دليل علي اهميته وانه مش شخص عادي وانه حكم مصر !

اما الرد علي الادله و الافتراضات اللي اعتمد عليها الباحث احمد عثمان فهو امر سهل وبسيط لان كل الادلة الافتراضية اللي جمعها هي ضعيفة وواهيه فتعالى نرد عليه :

- يويا ظهر في القرن الرابع عشر قبل الميلاد بينما النبي يوسف وطبقا للمقارنات الزمنية في التوراة فانه قد ظهر حوالي ٢٠٠٠ ق م

- يويا كانت وظيفته الفعلية اما كاهن للاله مين او مشرف علي الاسطبلات بينما النبي يوسف في التوراة تعلقت وظيفته بالتخزين والمخازن وتنظيم الزراعة

- لقب الاب الالهي اللى اعتمد عليه احمد عثمان في نظريته لم يكن حكرا علي يويا و فيه شخصيات كتيرة حملت اللقب ده

- عمر يويا عند الوفاة وطبقا لفحص اليوت سميث والاشعة المقطعية كان ما بين ٥٠ و ٦٠ سنة بينما التوراة ذكرت عمر النبي يوسف بانه ١١٠ سنة

- لا يمكن الحكم علي ملامح يويا ولون بشرته الفاتحة وشعره الابيض المموج وانفه المعقوفة واعتباره اجنبي فالملك المصري رمسيس الثاني كان صاحب بشرة مشابهة وشعر متموج ابيض (مصبوغ بالحنة) وانف معقوف و مش اجنبي

- دفن يويا في وادي الملوك ربما يعطي له اهمية ولكن الاهمية كانت بسبب انه والد الملكة تي زوجة امنحتب الثالث مش عشان أنه له سلطة في القصر الملكي كمان فيه شخصيات غير ملكية ادفنت في وادي الملوك و مكانش ليهم اهمية في السلطة مثل المرضعة "راي" ومرضعة حتشبسوت "سات رع ان" والقائد العسكري "ماي حر بري"

- وجود العجله الحربية في مقبرة يويا مش معناه خالص انها هدية من الملك ف يويا كان مشرف علي الاحصنة والاسطبل
و مفيش نص بيقول ان الملك اداله العربيه هديه و يويا مكانش الشخصيه الوحيده اللي كان عندها عجله حربيه في وادي الملوك ففي "ماي حر بري" و مش معنى ان مقبره يويا مكانش فيها مناظر ف ده مش معناه انه مكانش مؤمن بيها او كان على ديانه مش مؤمنه بالمناظر ففيه مقابر مافيهاش مناظر مع ان تابوت يويا و تويا مليان مناظر و نقوش يا حب

- خد اهم رد بجا ..
التوراة قالت ان بني اسرائيل لما خرجوا من مصر خدوا معاهم عظام النبي يوسف و ده معناه ان النبي يوسف مش مدفون في مصر وجسده غير موجود بمصر

انا عارف ان فيه ناس كتيرة كانت عاجباهم القصة وانهم طبعا بيتمنوا ان جسد النبي يوسف يكون مدفون في مصر ..لكن للتاريخ والادلة التاريخية بيقولوا عكس ده

و كمان عايز اقولك ان ربنا هيسبب الاسباب عشان ماتكونش جثه نبي من انبياءه معروضه كده قصاد الزوار ف استحاله تكون دي جثه النبي يوسف عليه السلام
ابقى اذكرني بدعوه حلوه الله يخليك

مقال للدكتور Bassem Abu-zaid